| mið 05.okt 2022 12:45 Mynd: Fótbolti.net - Hafliði Breiðfjörð |
|
Lið ársins í Bestu deild kvenna 2022
Lið ársins í Bestu deild kvenna var opinberað í Heimavellinum í vikunni. Úrvalsliðið má sjá hér að neðan.
Sandra Sigurðardóttir.
Mist og Arna Sif.
Sif Atladóttir.
Þórdís Hrönn Sigfúsdóttir.
Katrín Ásbjörnsdóttir og Jasmín Erla Ingadóttir.
Heimavöllurinn: Besta eftirpartýið
Sandra Sigurðardóttir - Valur
Landsliðsmarkvörðurinn hefur verið að taka stór skref fram á við í sínum leik. Er búin að bæta sig ótrúlega mikið á síðustu árum og var virkilega góð í sumar.
Sif Atladóttir - Selfoss
Kom aftur heim til Íslands fyrir tímabilið og spilaði mikilvægt hlutverk í ungu liði Selfoss. Algjör leiðtogi og hefur enn gríðarlega mikið fram að færa inn á vellinum. Það eru gleðitíðindi fyrir Selfoss að hún ætli að halda áfram að spila næstu tvö árin hið minnsta.
Mist Edvardsdóttir - Valur
Var leikmaður ársins í fyrra og fylgdi því eftir með stórkostlegri frammistöðu í sumar. Hún og Arna Sif voru magnaðar saman. Gríðarlega svekkjandi að sjá Mist slíta krossband enn á ný og möguleiki er á því að skórnir séu komnir upp á hillu hjá henni.
Arna Sif Ásgrímsdóttir - Valur
Hinn hlutinn af besta miðvarðapari deildarinnar. Var kosin best af leikmönnum deildarinnar og er það mjög skiljanlegt. Algjörlega stórkostleg á tímabilinu og frábær viðbót við lið Vals.
Sædís Rún Heiðarsdóttir - Stjarnan
Einn efnilegasti leikmaður deildarinnar og klárlega framtíðarleikmaður í A-landsliðinu ef hún heldur áfram á sömu braut. Mjög spennandi leikmaður.
Lára Kristín Pedersen - Valur
Gríðarlega vanmetinn leikmaður sem spilaði ótrúlega mikilvægt hlutverk í liðinu sem varð bæði Íslands- og bikarmeistari í sumar. Ótrúlega vanmetinn leikmaður.
Karitas Tómasdóttir - Breiðablik
Heilt yfir var Karitas ljósasti punkturinn í liði Breiðabliks sem olli vonbrigðum í sumar. Var traust á miðsvæðinu og mjög mikilvæg í leik Kópavogsfélagsins.
Þórdís Hrönn Sigfúsdóttir - Valur
Óx mjög í sínum leik eftir því sem leið á tímabilið og var sá leikmaður sem kom að flestum mörkum í sumar. Var best í síðasta þriðjungi deildarinnar.
Katla Tryggvadóttir - Þróttur R.
Er bara fædd árið 2005 en er strax farin að sýna það hversu góð hún er og hversu góð hún getur orðið. Gríðarlega skapandi leikmaður sem skipti miklu máli fyrir Þrótt.
Jasmín Erla Ingadóttir - Stjarnan
Markadrottning Bestu deildarinnar var að eiga sitt besta tímabil á ferlinum eftir að hafa komið til baka bæði eftir krossbandsslit og barneign. Var verðlaunuð fyrir góða frammistöðu í sumar með sæti í A-landsliðinu.
Katrín Ásbjörnsdóttir - Stjarnan
Var mjög mikilvæg fyrir sóknarleik Stjörnunnar í sumar og hennar samvinna við Jasmín var mjög eftirtektarverð. Skoraði níu mörk og var gríðarlega öflug.
Varamenn
Íris Dögg Gunnarsdóttir - Þróttur R.
Samantha Murphy - Keflavík
Natasha Moraa Anasi - Breiðablik
Elísa Viðarsdóttir - Valur
Ásdís Karen Halldórsdóttir - Valur
Gyða Kristín Gunnarsdóttir - Stjarnan
Olga Sevcova - ÍBV
Cyera Hintzen - Valur
