Það voru mörg forföll í landsliðshópinn fyrir vináttulandsleikina gegn Mexíkó, Færeyjum og Póllandi. Því þurfti Arnar að velja leikmenn úr Pepsi Max-deildinni í hópinn.

Þetta hefur aðeins riðlað keppni í Pepsi Max-deildinni og leikjum verið frestað.

„Ég skil alveg að það er enginn fullkominn heimur til. Ef allt hefði verið eins og ég hefði á kosið þá hefði enginn farið frá Íslandi í þessa leiki," sagði Arnar en hann er ánægður með þá leikmenn.

„Við getum talað um alla strákana sem koma frá Íslandi, þeir hefðu þá ekki fengið þessa reynslu. Það er mikilvægara fyrir okkur en tveir, þrír leikir sem færast til."

„Eftir leikinn við Mexíkó sat ég uppi með einn hafsent. Það er frekar skrýtið ef A-landslið karla færi í tvo landsleiki með einn hafsent. Þá væri gagnrýnin aðeins meiri heldur en ef það þyrfti að færa einhverja leiki."

Hjörtur Hermannsson var eini miðvörðurinn í íslenska hópnum sem spilar erlendis eftir að Ragnar Sigurðsson dró sig úr hópnum. Kári Árnason dró sig einnig úr hópnum. Ísak Óli Ólafsson, leikmaður Keflavíkur, og Brynjar Ingi Bjarnason, leikmaður KA, eru í hópnum.

Sjá einnig:
„Ekki bara byrjaðir að banka á dyrnar, þeir eru búnir að opna hurðina"