Barcelona mun spila í Meistaradeild Evrópu á næstu leiktíð en liðið vann Real Betis, 2-1, er liðin mættust í spænsku deildinni í kvöld.

Mörkin létu bíða eftir sér í Seville-borg. Það var ekki fyrr en á 76. mínútu sem Ansu Fati gerði fyrsta mark leiksins, stuttu eftir að hann kom inná sem varamaður.

Marc Bartra, fyrrum leikmaður Barcelona, jafnaði metin fyrir Betis þremur mínútum síðar áður en Jordi Alba skoraði sigurmarkið fyrir gestina undir lok leiks.

Sigurinn þýðir að Barcelona er búið að tryggja sæti sitt í Meistaradeild Evrópu fyrir næstu leiktíð en liðið er í 2. sæti með 69 stig, ellefu stigum meira en Betis sem er í 5. sætinu þegar þrír leikir eru eftir.

Staðan var ekki góð þegar Ronald Koeman var rekinn frá félaginu í lok október. Xavi tók við í byrjun nóvember og náði að færa liðið hægt og rólega upp töfluna.