Settu heimsmet í bylgju

Í tilefni þess að HM fer af stað á fimmtudaginn safnaðist fólk saman úti á götu í Mexíkóborg til að freista þess að setja heimsmet í bylgju.

Bylgjan er þekkt athöfn á fótboltaleikjum og margir vilja meina að hún eigi uppruna sinn í Mexíkó en það er þó umdeilt. Allavega gerðu stuðningsmenn Mexíkó hana fræga á HM 1986.

Margir af þeim sem ákváðu að taka þátt í heimsmettilrauninni voru klæddir í mexíkóska landsliðsbúninginn en heimsmetabók Guinness er nú að skoða bylgjuna áður en mögulegt heimsmet verður staðfest.

Fjölmennasta bylgja sögunnar var á Nascar kappakstri í Tennessee Bandaríkjunum 2008 en 157.574 tóku þá þátt. Lengsta bylgjan kom í Portúgal 2007 og sú sem tók lengstan tíma var 17 mínútur og 14 sekúndur í Japan 2015.