Jannik Vestergaard, miðvörður Southampton, er aðal skotmark Tottenham á félagsskiptamarkaðnum næsta sumar.
Jose Mourinho, sem er kominn undir töluverða pressu hjá Tottenham, vill styrkja varnarlínuna hjá sér og þar er Daninn efstur á blaði.
Tottenham féll óvænt úr leik í Evrópudeildinni á dögunum og þá hafði félagið gefið töluvert eftir í deildinni á nýju ári. Félagið á þó enn góðan möguleika á að ná Meistaradeildarsæti.
Mourinho er byrjaður að pressa á stjórn Tottenham fyrir sumarið og vill hann fá Vestergaard til liðsins fyrir næsta tímabil.
Vestergaard hefur verið lykilleikmaður hjá Southampton á þessu tímabili og þá hefur hann einnig verið að spila mjög vel með danska landsliðinu.
Southampton var í sjöunda sæti deildarinnar þegar Vestergaard meiddist á hné og í kjölfarið hrundi leikur liðsins.
Mourinho hafði áhuga á að fá Milan Skriniar, varnarmann Inter Milan, en það tókst ekki að koma því í gegn í janúar glugganum.
Athugasemdir