Bournemouth, Brighton og Fulham vissu mikilvægi þess að ná í sigra í dag enda lítið eftir af tímabilinu.

Leikur Bournemouth og Fulham var áhugaverður en tvö rauð spjöld voru gefin undir lok fyrri hálfleiksins. Ryan Christie, leikmaður Bournemouth, sá rauða spjaldið fyrir glæfralegt brot á Timothy Castagne. Hann fékk gula spaldið, en litnum var breytt eftir skoðun VAR.

Stuttu síðar sá Joachim Andersen, leikmaður Fulham, rauða spjaldið fyrir ljóta tveggja fóta tæklingu á Adrien Truffert. Mikill hiti í Lundúnum, en þó jafnt í liðum þegar flautað var til loka fyrri hálfleiks.

Snemma í síðari hálfleik gerði Rayan sigurmarkið, en Bournemouth hafði verið að hóta því nokkrum mínútum áður. Eli Junior Kroupi átti tilraun sem hafnaði í slá og síðan kom sigurmarkið frá Rayan með skoti fyrir utan teig sem fór af Calvin Bassey og í netið.

Hrikalega sterkt hjá Bournemouth sem er í 6. sæti með 55 stig, þremur stigum frá Aston Villa sem er í fimmta sæti, en Fulham er í 11. sæti með 48 stig og möguleikinn á að komast í Evrópu nánast úti.

Sunderland gerði markalaust jafntefli við Manchester United á leikvangi ljóssins.

Man Utd var án nokkurra lykilmanna í leiknum á borð við Casemiro og Benjamin Sesko.

Sunderland fékk svo sannarlega færin til þess að fá eitthvað meira úr leiknum, en þau fóru forgörðum. Sunderland var betri aðilinn í fyrri hálfleik og átti Noah Sadiki besta færið er hann komst einn á móti Senne Lammens en sá belgíski varði frá samlanda sínum.

Í síðari átti Lutsharel Geertruida fínt færi sem hann setti í tréverkið áður en Matheus Cunha gat stolið öllum stigunum undir lokin en Robin Roes varði frábærlega.

Markalaust jafntefli niðurstaðan en alveg eðlilegt að leikmenn Sunderland séu svekktir með úrslitin miðað við gang mála í leiknum. Man Utd er í 3. sæti með 65 stig en Sunderland í 12. sæti með 48 stig.

Brighton vann mikilvægan 3-0 sigur á föllnu liði Wolves. Jack Hinshelwood og Lewis Dunk komu Brighton í tveggja marka forystu á fyrstu fimm mínútunum og gerði síðan Yankuba Minteh út um leikinn undir lok leiks.

Brighton er í 7. sæti með 53 stig og enn í baráttu um Evrópusæti á meðan Wolves er á botninum með 18 stig.

Úrslit og markaskorar:

Brighton 3 - 0 Wolves
1-0 Jack Hinshelwood ('1 )
2-0 Lewis Dunk ('5 )
3-0 Yankuba Minteh ('86 )

Fulham 0 - 1 Bournemouth
0-1 Rayan ('53 )
Rautt spjald: ,Ryan Christie, Bournemouth ('41)Joachim Andersen, Fulham ('45)

Sunderland 0 - 0 Manchester Utd