Bose mótið: Stjarnan kom til baka og spilar um þriðja sætið

Stjarnan og KR áttust við í riðli 2 í Bose mótinu og lauk leiknum með fjögurra marka jafntefli.

KR komst í tveggja marka forystu á Samsungvellinum í dag en Kristján Flóki Finnbogason og Stefán Árni Geirsson sáu um að skora mörkin. Staðan var því 0-2 þegar flautað var til leikhlés.

Stjarnan kom hins vegar til baka og jafnaði leikinn. Örvar Eggertsson, sem gekk í raðir liðsins frá HK, skoraði sem og Emil Atlason úr vítaspyrnu.

Þetta þýðir að Stjarnan mun leika um bronsið á mótinu en það á eftir að koma í ljós gegn hvaða liði. Leik FH og Vals var frestað í dag og fer hann fram á miðvikudaginn.