Messi steinhissa þegar hann hitti Daníel - „Manstu eftir mér?“

Daníel Tristan Guðjohnsen og Lionel Messi áttu gott spjall eftir að leik Íslands og Argentínu lauk í nótt.

Messi spilaði með Eiði Smára Guðjohnsen, pabba Daníels, hjá Barcelona á sínum tíma og var það kveikjan að samskiptunum.

Messi var spurður út í hvað fór þeirra á milli í viðtali eftir leik:„Hann spurði mig: Manstu eftir mér? Ég varð mjög hissa þá en síðan kynnti hann sig sem son Eiðs.“

„Ég hreinlega mundi ekki eftir honum, hann var mjög lítill þegar við Eiður spiluðum saman. Ég man samt eftir að hafa séð hann á nokkrum æfingum þegar hann var með pabba sínum,“ sagði Messi og mátti sjá hann brosa þegar hann ræddi um Daníel.

Þá bað Daníel um treyju frá Messi sem hafði þegar skipt við Jón Dag Þorsteinsson en það kom ekki að sök þar sem hann var með aðra inni í klefa og gekk Daníel af velli með treyjuna um hálsinn.