Fram tapaði gegn Vestra á Ísafirði í dag. Liðið var með 2-1 forystu en Vestri jafnaði og sigurmarkið kom í uppbótatíma. Fótbolti.net ræddi við Rúnar Kristinsson, þjálfara Fram, eftir leikinn.
Lestu um leikinn: Vestri 3 - 2 Fram
„Gríðarleg vonbrigði. Mér fannst við vera góðir í dag, mikið með boltann, sköpum mikið af færum og skorum tvö mörk. Eins og ávalt er með Vestra þá gefast þeir aldrei upp og þeir bíða eftir sínum tækifærum og nota þau vel," sagði Rúnar.
„Það eina sem ég er ósáttur við í okkar leik eru þessu þrjú mörk sem við fáum á okkur því það var svo margt sem við hefðum getað gert betur í aðdragandanum á þeim öllum. Tala nú ekki um síðasta markið þar sem við erum að flýta okkur að koma boltanum í leik. Það er jákvætt að því leytinu til að við vildum fara upp völlinn og skora sigurmarkið. Þá flýtum við okkur aðeins af stað og gefum boltann frá okkur og upp úr því skora þeir sigurmarkið. Það var óþarfi að tapa þessu, mér fannst Fram heilt yfir miklu betra fótboltalið."
Næsti leikur liðsins er gegn KR á heimavelli.
„Við erum spenntir. Við erum búnir að vera á fínu skriði. Við vorum ekki búnir að tapa síðan 2. júní, það hlaut að koma að því og því miður kom það hér á móti liði sem við erum að berjast við í efri hlutanum í augnablikinu. Það er fljótt að breytast, KR á heimavelli verður gaman, það er krefjandi leikur fyrir okkur og vonandi krefjandi leikur fyrir þá líka," sagði Rúnar.
