Farid Zato.
Íslandsmeistarar KR vonast ennþá til að semja við miðjumanninn Farid Zato sem var á reynslu hjá félaginu á dögunum.
Farid gerði í lok febrúar eins árs samning við Þór en KR-ingar vonast þrátt fyrir það ennþá til að krækja í leikmanninn.
Farid gerði í lok febrúar eins árs samning við Þór en KR-ingar vonast þrátt fyrir það ennþá til að krækja í leikmanninn.
,,Við buðum honum samning og höfum klárlega áhuga á stráknum," sagði Baldur Stefánsson varaformaður knattspyrnudeildar KR við Fótbolta.net í dag.
,,Hann var gestur okkar á reynslu þegar Þósararnir stukku til. Okkur hefði fundist eðlilegra að þeir hefðu haft samband við okkur áður en þeir ræddu við mann sem var okkar gestur. Þetta er mál sem er í ákveðnu ferli og það fæst vonandi niðurstaða í það á næstu dögum."
,,Við viljum vinna þetta í góðri sátt við bæði leikmanninn og Þór þannig að allir séu sáttir við þá niðurstöðu sem fæst í þetta mál, hver sem hún verður. Það eru engin leiðindi á milli okkar og Þórs."
,,Við töldum okkur vera í viðræðum við hann þegar hann var okkar gestur og við vorum líka að ræða við uppeldisfélag hans í Togo sem stýrir hans málum ásamt honum sjálfum. Við höfum mikinn áhuga á að fá hann til okkar ef það getur gengið."
Hinn 21 árs gamli Farid sýndi fína takta með Víkingi Ólafsvík síðastliðið sumar og var meðal annars verðlaunaður með sæti í landsliði Tógó.
Athugasemdir
