Gylfi hafði mikil áhrif á Kane

Það sem skildi Kane frá mörgum öðrum ungum leikmönnum voru ekki aðeins hæfileikarnir, heldur hugarfarið. Hann var kannski ekki sá sem mest var talað um í akademíu Tottenham, en hann var tilbúinn að leggja meira á sig en flestir til þess að ná markmiðum sínum.

„Ég held að þetta sé blanda af yfirnáttúrulegum hæfileikum og rosalegri vinnusemi. Þegar hann var í akademíunni þótti hann ágætur með hægri fótinn og á köflum á kantinum, en menn voru ekki sannfærðir um að hann gæti orðið stórstjarna,“ sagði Ingimar Helgi Finnsson, stuðningsmaður Tottenham, við Fótbolta.net.

„Það sem menn hafa hins vegar talað um er vinnusemin hans. Hann var að æfa aukalega, leggja mikið á sig og hugsa vel um sjálfan sig. Allt þetta var í hæsta gæðaflokki. Það er ekki nóg að vera hæfileikaríkur; þú þarft líka að vera tilbúinn að leggja vinnuna í þetta.“

Þar kemur einnig inn áhugaverður íslenskur vinkill. Gylfi Þór Sigurðsson hafði nefnilega mikil áhrif á feril Kane. Við öll sem höfum fylgst með íslenskum fótbolta vitum hvernig vinnubrögð Gylfi tileinkar sér, en Gylfi var einn þeirra leikmanna sem Kane fylgdist með á sínum yngri árum hjá Tottenham og sá hvernig mætti nýta tímann utan hefðbundinna æfinga til þess að bæta sig.

„Ég man eftir því að hann talaði um hvernig hann sá Gylfa og aðra leikmenn æfa aukalega eftir æfingar. Gylfi var greinilega einn af þeim sem höfðu áhrif á hann," sagði Ingimar en Tim Sherwood, sem þjálfaði Tottenham á þessum tíma, talaði líka um þetta.

„Mestu áhrifavaldarnir inni á vellinum voru Gylfi Sigurðsson og Christian Eriksen. Þarna voru tveir ungir leikmenn sem sýndu frábært fordæmi á æfingum og það fór ekki framhjá Harry Kane. Hann var alls ekki illa staddur og þurfti kannski ekki á þessari leiðsögn að halda en þetta var það sem hann vildi og hann varð mjög náinn þessum leikmönnum,“ sagði Sherwood.

TENGT EFNI27.10.26 - 15:00

Hafnað af Arsenal, kolvitlausir spádómar og áhrifin frá Gylfa