Kompany fór úr axlarlið

Kompany hafði glímt við veirusýkingu fyrr í sömu viku en náði sér fljótt og var mættur á hliðarlínuna gegn Arsenal í Meistaradeildinni.

Nokkrum dögum síðar hneig hann hins vegar niður á æfingasvæðinu og var fluttur í skyndi á sjúkrahús. Síðan hefur komið fram í fjölmiðlum að Kompany hafi unnið langt umfram það sem gott þykir og sökkt sér svo djúpt í starfið að það hafi leitt til svefnleysis, mikillar streitu og álags.

Kompany meiddist einnig við fallið, en þýskir fjölmiðlar greina frá því að hann hafi farið úr axlarlið þegar hann hneig niður.

Bayern hefur gefið þeim sem hyggjast heimsækja Kompany skýr fyrirmæli um að ræða ekki við hann um fótbolta. Félagið vill að hann einbeiti sér alfarið að því að ná heilsu á ný, en búist er við að hann verði frá störfum næstu vikurnar.

Ekki hefur enn tekist að staðfesta nákvæmlega hvers vegna Kompany hneig niður, en vitað er að hann hafði verið með mikinn höfuðverk fyrir atvikið. Búið er að útiloka hjartaáfall og samkvæmt stjórnarmönnum Bayern hefur líðan hans batnað töluvert og batinn er á réttri leið.

Kompany mun missa af leikjunum gegn Dortmund, Atlético og Mainz, en ekki er búist við að hann snúi aftur til starfa fyrr en eftir landsleikjahléið í nóvember.