Lengjudeildin: Afturelding fór illa með Völsung - Óðinn með þrennu

Afturelding er í banastuði í Lengjudeildinni, en liðið vann 6-1 stórsigur á Völsungi á GPG-vellinum á Húsavík í dag. Þetta var fjórði sigur Mosfellinga í röð.

Óðinn Bjarkason var ekki lengi að láta til sín taka og kom Aftureldingu yfir á 11. mínútu.

Fyrirgjöf kom frá hægri og upp í vindinn. Stefán Stefánsson, markvörður Völsungs, virtist vera með boltann í teskeiðinni en lenti í árekstri við leikmenn beggja liða og missti af honum. Boltinn datt fyrir Óðinn, sem setti hann í tómt markið.

Bjartur Bjarmi Barkarson tvöfaldaði forystuna skömmu síðar. Hann fékk boltann vinstra megin í teignum og reyndi sendingu sem fór af varnarmanni Völsungs og aftur til hans. Bjartur þakkaði fyrir sig og afgreiddi boltann í fjærhornið.

Völsungur minnkaði muninn á 25. mínútu. Modoumatarr Mbye átti þá frábæran sprett upp völlinn áður en hann renndi boltanum fyrir Elfar Árna Aðalsteinsson, sem kláraði færið af yfirvegun og kom heimamönnum aftur inn í leikinn.

Það reyndist þó aðeins vara í örskamma stund því Óðinn gerði út um leikinn skömmu síðar.

Hann skoraði tvö mörk á þremur mínútum. Fyrst gerði hann annað mark sitt með laglegri afgreiðslu á 29. mínútu og síðan fullkomnaði hann þrennuna eftir sendingu frá Birki Má Sævarssyni.

Afturelding hélt áfram að keyra í síðari hálfleik. Axel Óskar Andrésson gerði fimmta markið þegar hann fékk boltann utarlega í teignum og átti skot sem lak í netið.

Róbert Agnar Daðason rak síðan síðasta naglann í kistu Völsungs aðeins sekúndum eftir að hafa komið inn á sem varamaður.

Sannfærandi 6-1 sigur Aftureldingar, sem er á toppnum með 28 stig, fjórum stigum meira en næsta lið, og hefur nú unnið fjóra leiki í röð. Völsungur er hins vegar í næstneðsta sæti með 8 stig.