Aron Jó leggur skóna formlega á hilluna

„Eftir öll þessi ár í fótbolta er komið að því að leggja skóna á hilluna (Skórnir hafa reyndar verið uppá hillu í smá tíma)," skrifar Aron Jóhannsson á Instagram.

„Fótboltinn hefur verið ótrúlega stór hluti af lífi mínu frá því að ég man eftir mér og gefið mér ótrúlega mikið."

Aron átti 36 ára afmæli í gær en hann hefur snúið sér að umboðsmannastörfum fyrir CAA Stellar.

Aron var fyrir ári síðan leystur undan starfsskyldum hjá Val og spilaði ekkert á síðasta tímabili.

Aron lék með Fjölni, AGF, AZ Alkmaar, Werder Bremen, Hammarby, Lech Poznan og Val á sínum ferli.

Hann lék tíu leiki með íslenska U21 landsliðinu en ákvað svo að velja það að spila með Bandaríkjunum, hvar hann er fæddur, spilaði 19 landsleiki, skoraði fjögur mörk og lék á HM í Brasilíu 2014 með bandaríska liðinu.

Hann vann dönsku fyrstu deildina með AGF og hollenska bikarinn með AZ. Samkvæmt Wikipedia skoraði hann 104 mörk sem atvinnumaður erlendis. Eftir komuna til Vals spilaði hann aftar á vellinum og skoraði 20 mörk á fjórum tímabilum á Hlíðarenda.