„Ég er hæstánægður, sérstaklega með að fá inn leikmann svona snemma. Í félagaskiptaglugganum vilja málin oft dragast en varðandi undirbúning næsta tímabils er þetta mjög mikilvægt," segir Gary O'Neil stjóri Wolves.

„Rodrigo átti frábært síðasta tímabil, lék í mörgum stöðum og er bara 20 ára gamall. Hann er ungur og getur orðið betri. Þetta eru frábær kaup fyrir félagið."

Gomes er U21 landsliðsmaður Portúgals og lék á láni með Estoril á liðnu tímabili, lék 30 leiki og skoraði sjö mörk. Hann spilaði sinn fyrsta leik fyrir Braga 2020 og skoraði eitt mark í 43 leikjum fyrir félagið.

Hann er þriðji leikmaðurinn sem heitir Gomes í leikmannahópi Wolves, fyrir hjá félaginu voru varnarmaðurinn Toti Gomes og miðjumaðurinn Joao Gomes.

Gomes er annar leikmaðurinn sem Wolves kaupir í sumar en félagið keypti áður Tommy Doyle, sem var á láni frá Manchester City á liðnu tímabili.