Ragnar Sigurðsson hefur skrifað undir nýjan tveggja ára samning við Rostov í rússnesku úrvalsdeildinni. Félagið staðfesti þetta á Instagram í kvöld.
Ragnar var með lausan samning en nú er ljóst að hann verður áfram hjá Rostov. Þar spila einnig íslensku landsliðsmennirnir Björn Bergmann Sigurðarson og Sverrir Ingi Ingason.
Hinn 32 ára gamli Ragnar kom til Rostov frá Fulham í janúar en hann hafði fyrri hluta tímabilsins í Rússlandi verið á láni hjá Rubin Kazan
Ragnar hefur á ferli sínum erlendis einnig spilað með Gautaborg, FC Kaupmannahöfn og Krasnodar.
Eftir HM tilkynnti Ragnar óvænt að hann sé hættur að spila með íslenska landsliðinu en hann hefur skorað þrjú mörk í 80 landsleikjum á ferlinum.
Rostov endaði í ellefta sæti af sextán liðum í rússnesku úrvalsdeildinni á síðasta tímabili en nýtt tímabil hefst 28. júlí.
Athugasemdir