Sannanir fyrir því að boltinn fór ekki í vír

Daily Mail segir að búið sé að staðfesta að fyrra mark Jude Bellingham í 2-1 sigri Englands á Noregi hafi réttilega verið látið standa. Norðmenn héldu því fram að boltinn hefði lent á vír sem hélt uppi myndavél á vellinum og breytt um stefnu eftir útspark markvarðarins Örjan Nyland.

Ef það hefði gerst hefði með réttu átt að stöðva leikinn, dæma markið af og framkvæma dómarakast.

FIFA ku hafa skoðað þetta atvik og blaðamenn Daily Mail hafa séð upptökur sem sýni náttúrulegt flug á boltanum. Þá sýni upptaka úr sjálfri myndavélinni sem er hengd á vírinn engan hristing.