Lengjubikar kvenna: Breiðablik á toppinn

Breiðablik er komið í toppsætið í riðli 2 í A-deild Lengjubikarsins eftir að liðið vann 2-0 sigur á ÍBV á Kópavogsvelli í dag.

Hafrún Rakel Halldórsdóttir kom Blikum í forystu á 12. mínútu leiksins og liðu aðeins níu mínútur fram að næsta marki.

Agla María Albertsdóttir skoraði þá úr vítaspyrnu en þetta var sjötta mark hennar í Lengjubikarnum í ár.

Blikar eru á toppnum í riðlinum með 10 stig, jafn mörg og Stjarnan fyrir lokaumferðina. Blikar mæta Keflavík í síðustu umferð en Stjarnan spilar við ÍBV.