4. deild: Tvö rauð spjöld fóru á loft er Elliði komst aftur á sigurbraut

Elliði vann sinn fjórða deildarsigur á tímabilinu þegar liðið hafði betur gegn KFR, 4-1, í 4. deild karla í gær.

Árbæingar höfðu tapað þremur leikjum í röð fyrir leikinn, en KFR hafði ekki unnið síðan í byrjun júní.

Benedikt Elí Bachmann kom Elliða yfir og Pétur Óskarsson bætti við öðru marki fyrir hlé.

Gestirnir unnu sig aftur inn í leikinn snemma í síðari hálfleik þegar Helgi Valur Smárason skoraði úr vítaspyrnu á 52. mínútu.

Pétur skoraði hins vegar sitt annað mark þegar síðari hálfleikurinn var hálfnaður og kom Elliða aftur í tveggja marka forystu.

KFR varð manni færra fimm mínútum fyrir leikslok þegar varamaðurinn Aron Birkir Guðmundsson fékk að líta rauða spjaldið. Ellert Geir Ingvason, sem var í liðsstjórn gestanna, var einnig rekinn af velli.

Natan Hjaltalín innsiglaði síðan 4-1 sigur Elliða þremur mínútum síðar.

Elliði er í fjórða sæti deildarinnar með 13 stig, en KFR situr í sjöunda sæti með átta stig.