Englandsmeistarar Liverpool mörðu 1-0 sigur á Burnley í 4. umferð ensku úrvalsdeildarinnar á Turf Moor í dag. Sigurmarkið kom úr vítaspyrnu eftir klaufaleg mistök í uppbótartíma.

Fyrri hálfleikurinn fór alveg eins og Burnley hafði lagt upp með, en Liverpool fann fáar opnanir á varnarleik þeirra og ekkert þannig lagað upplagt dauðafæri.

Í byrjun leiksins var franski miðjumaðurinn Lesley Ugochukwu heppinn að vera enn inn á vellinum er hann fór í harkalega tæklingu á Alexis Mac Allister og fylgdi vel á eftir í ökklann á honum. Michael Oliver, dómari leiksins, gaf honum gult spjald sem VAR staðfesti síðan.

Milos Kerkez, bakvörður Liverpool, sá því næst gula spjaldið fyrir dýfu í vítateig Burnley og var hann tekinn af velli þegar lítið var eftir af hálfleiknum. Arne Slot þorði ekki að taka neina sénsa og setti því Andy Robertson inn á.

Skotinn skapaði hættu um leið. Hann hljóp í gegnum vörn Burnley áður en hann tók utanfótarskot, en það fór beint á Martin Dubravka í markinu.

Hugo Ekitike átti tilraun sem fór rétt framhjá markinu, en annars var þetta heldur dapurt hjá gestunum sem áttu margar feilsendingar og ekki alveg upp á sitt besta.

Markalaust í hálfleik í Lundúnum, en Slot átti greinilega þokkalega ræðu því leikmenn Liverpool mættu einbeittari inn í þann síðari. Hægri bakvörðurinn Conor Bradley kom inn fyrir Mac Allister og var því Dominik Szoboszlai færður inn á miðsvæðið.

Ryan Gravenberch hótaði marki snemma í síðari hálfleik er bolti var skallaður út í teiginn og á Hollendinginn sem þrumaði boltanum rétt yfir markið. Rétt áður hafði Cody Gakpo fallið í teignum en ekkert dæmt.

Gestirnir héldu áfram að sækja og var það Bradley sem átti næstu tilraun er hann skallaði fyrirgjöf Robertson rétt framhjá markinu.

Florian Wirtz var næstur til að ógna. Hann dansaði með boltann við vítateigslínuna áður en hann setti boltann rétt framhjá stönginni. Liverpool farið að pressa verulega á Burnley-menn og vantaði bara herslumuninn í að klára sóknirnar með marki.

Szoboszlai átti hörkuskot á 58. mínútu sem Dubravka þurfti að hafa sig allan í að verja aftur fyrir endamörk.

Þetta virkaði bara ekki eins og dagur Liverpool-manna. Þeir reyndu og reyndu, en voru áfram í erfiðleikum með að opna heimamenn.

Ítalski vængmaðurinn Federico Chiesa kom inn af bekknum fyrir Hugo Ekitike og fékk strax færi til að koma Liverpool yfir en skallaði fyrirgjöf Robertson framhjá og þá átti Szoboszlai fast skot en aftur fór tilraun Liverpool-manna framhjá markinu.

Tíminn var að renna út en það hjálpaði gestunum þegar Ugochukwu fékk sitt annað gula spjald og þar með rautt fyrir klaufalegt brot á Wirtz.

Allt leit út fyrir að Burnley myndi halda þetta út, en í uppbótartíma gerði Hannibal Mejbri grátleg mistök er hann rétt út höndina er Jeremie Frimpong reyndi fyrirgjöf.

Vítaspyrna dæmd og var það Mohamed Salah sem fór á punktinn og skoraði af miklu öryggi. Ótrúlega svekkjandi fyrir Burnley sem varðist frábærlega í 90 mínútur.

Liverpool tók öll stigin og er áfram með fullt hús stiga á toppi deildarinnar eftir fjórar umferðir en Burnley með 3 stig í 17. sæti deildarinnar.