Kroenke feðgar orðnir stjórnarformenn Arsenal

Bandaríkjamaðurinn Stan Kroenke er 75 ára en hann keypti 9,7 hlut í Arsenal 2007, eignaðist meirihluta í félaginu 2011 og svo 100% eignarhald 2018.

Hann segir breytingarnar „staðfesta enn frekar skuldbindingu fjölskyldunnar við þetta frábæra félag".

Í yfirlýsingu segir að stöðugleiki hafi aldrei verið mikilvægari í fótboltaheiminum og þetta sé góður tímapunktur til að skerpa á áherslum.

„Markmið okkar og metnaður munu aldrei dvína - að tefla fram liðum sem keppa um titla á hæsta stigi og leiða félagið á þann hátt að það hvetur ástríðufulla stuðningsmenn okkar um allan heim," segir Kroenke.

Lífið leikur við Arsenal sem er með fimm stiga forystu á toppi ensku úrvalsdeildarinnar þegar ellefu umferðir eru eftir.