Líkleg byrjunarlið Víkings og KR - Landsliðsmennirnir snúa aftur

Við spáum því að Sölvi Geir Ottesen geri tvær breytingar frá 2-1 bikarsigrinum gegn ÍA síðastliðinn föstudag. Gunnar Vatnhamar og Gylfi Þór Sigurðsson snúa aftur í væntanlegt byrjunarlið.

Vatnhamar er stærsta spurningamerkið, Sölvi sagði í viðtali við Fótbolta.net fyrr í dag að Gunnar ætti að vera klár. Hann meiddist í leik með Færeyjum í landsleikjahléinu og það ætti að vera ljóst á æfingu í dag hvort hann verði leikfær. Tarik Ibrahimagic og Sveinn Gísli Þorkelsson geta fyllt í hans skarð ef Gunnar verður ekki klár.

TENGT EFNI15.06.26 - 13:35

Kemur í ljós í dag hvort lykilmaður Víkings verði með

Þá snýr Gylfi Þór Sigurðsson aftur í liðið en hann var ekki með gegn ÍA þar sem hann var að koma úr landsleikjaverkefni. Hann spilaði rúmar tíu mínútur í 3-0 tapi gegn Argentínu og ætti því að vera hraustur.

Ármann Ingi heldur sæti sínu í líklegu byrjunarliði okkar en þar er verið að tippa á að Sölvi vilji hafa áræðni og hraða á vængnum til að refsa háu línu KR-inga. Erlingur Agnarsson gerir jafnframt tilkall í vængstöðuna.



Hjá KR er það helst að Arnór Ingvi Traustason og Ástbjörn Þórðarson snúa aftur eftir meiðsli. Arnór fór meiddur af velli gegn KA í síðasta leik en Ástbjörn hefur verið frá í rúman mánuð.

Fari svo að Ástbjörn verði ekki klár má búast við því að Michael Akoto fylli í hans skarð hægra megin. Akoto er þó takmarkaðri sóknarlega en Óskar hefur treyst á hann í fjarveru Ástbjarnar.

Þá verður jafnframt áhugavert að sjá ef Sigurður Breki fær tækifærið, eins og við tippum á, hvernig hann mætir feiknasterku miðju Víkinga. Stefán Árni Geirsson og Alexander Rafn Pálmason gera þá tilkall í sömu stöðu.

Alexander hefur verið frá í síðustu leikjum en er að koma til baka eftir meiðsli. Spilaði með U19 landsliðinu í landsleikjaglugganum í síðustu viku.