Þorsteinn Halldórsson var fúll og pirraður eftir leik sinna stúlkna gegn Val en leiknum lauk með 1-1 jafntefli. Með sigri hefðu Blikar komið sér í góða stöðu fyrir síðustu umferð deildarinnar en staðan er ekki björt fyrir Breiðablik eftir jafnteflið.
Lestu um leikinn: Breiðablik 1 - 1 Valur
Ertu ekki grautfúll með jafntefli miðað við hvernig leikurinn spilaðist?
„Að sjálfssögðu, við vorum betri aðilinn í leiknum en fótbolti snýst um að skora mörk og við vorum í basli með það í dag.''
Hvað finnst þér um þann vendipunkt í leiknum þegar þið eigið mögulega að fá vítaspyrnu en fáið mark í andlitið?
„Já mér fannst þetta vera víti en auðvitað sér dómarinn þetta öðruvísi, ég bjóst ekki við því að Ívar Orri myndi taka erfiða ákvörðun eftir gærdaginn þar sem hann var tekinn af lífi í fjölmiðlum þar sem hann gefur rautt spjald, þannig ég held hann hafi verið undir þannig pressu að hann hefði ekki viljað taka stóra ákvörðun í dag.''
Breiðablik á ennþá möguleika á titlinum, er vonin veik?
„Vonin er mjög veik.'' Sagði Steini hálf hlægjandi.
„Kraftaverk hafa gerst, við bjuggum til smá kraftaverk með því að jafna hérna í lokin og ég trúi á Gunnar Magnús vin minn að hann sé svona nánast eins og guð almáttugur.''
Viðtalið í heild sinni má sjá í spilaranum hér að ofan en þar ræðir Steini betur um leikinn, titilvonina, dómgæsluna og það að Ívar Orri skuli dæma svona leik daginn eftir bikarúrslitaleik þar sem hann fékk útrás í andlitið ásamt meiðslum Selmu Sólar.
