Áfall fyrir KR - Emil sleit krossband og Finnur ristarbrotnaði

Finnur Tómas, sem var valinn besti ungi leikmaður Pepsi Max-deildarinnar í fyrra, ristarbrotnaði á æfingu hjá Rangers í Skotlandi þar sem hann var til reynslu.

„Hann brotnaði hjá Rangers. Finnur þarf að fara í aðgerð. Það eru þrír mánuðir eftir aðgerð, sem hann er frá. Vonandi kemst hann í aðgerð sem fyrst. Finnur missir líklega af byrjun Pepsi Max-deildarinnar." segir Rúnar við 433.is um varnarmanninn unga.

Emil, sem kom frá Fylki eftir síðasta tímabil, sleit krossband í leik með KR gegn Fylki fyrir viku síðan. Emil festi takkana í gervigrasinu í Egilshöll.

Emil, sem er miðjumaður, missti af stærstum hluta síðasta tímabils vegna meiðsla. Hann skoraði eitt mark í átta leikjum fyrir Fylki í Pepsi Max-deildinni.

Rúnar segist ekki vita hvort KR muni leita út á leikmannamarkaðinn eftir þessi tíðindi. „Við þurfum að taka stöðuna. Við erum með breiðan hóp en hann minnkar við þetta. Samkeppnin er minni, við sjáum stöðuna á næstu vikum." segir Rúnar.