„Þetta svíður, það er klárt. Mjög sárt.“ sagði Ólafur Ingi Skúlason, þjálfari Breiðabliks, eftir 3-2 tap á Hlíðarenda í kvöld gegn Valsmönnum. Sigurmark leiksins kom alveg í blálokin.
Lestu um leikinn: Valur 3 - 2 Breiðablik
„Mér fannst við heilt yfir betri í fyrri hálfleik en það vantaði aðeins upp á þetta síðasta til þess að skapa færi, annars fannst mér við vera með yfirhöndina í þessu. Seinni hálfleikinn eigum við algjörlega frá A til Ö og gerum vel að komast í 2-1 en því miður ná þeir að skora hérna tvö mörk á okkur.“
Hvað gerist undir restina sem veldur því að Blikar missa 2-1 forystu niður í 3-2 tap?
„Ég hef ekki alveg svörin við því akkúrat núna. Þetta 2-2 mark er eitthvað þverhlaup og langur bolti sem við þurfum að skoða aðeins betur. Þeir geta refsað okkur á transition og við töluðum um það fyrir leik sem mér fannst við loka vel á en sofnuðum á verðinum þarna einu sinni. Svo í lokin fáum við horn sem endar með að þeir fá horn og þar kom sigurmarkið, því miður.“
Blikar vildu fá víti í seinni hálfleiknum þegar Ágúst Orri var sparkaður niður í teignum, Ólafur vildi ekki tjá sig um þá ákvörðun Jóhanns dómara leiksins að ekki dæma víti.
„Ég ætla bara að segja no comment, ég held að það sé langbest bara,“ sagði Ólafur Ingi og brosti kaldhæðnislega.
Viðtalið við Ólaf má finna í heild sinni í spilaranum hér að ofan.
