Lengjudeildin: Fylkir með sannfærandi sigur á Njarðvík

Fylkir vann öruggan sigur á Njarðvík í Lengjudeildinni í kvöld. Fylkismenn komust yfir með laglegu marki. Tumi Fannar Gunnarsson sendi boltann meðfram jörðinni úr aukaspyrnu á Mána Austmann Hilmarsson, hann sendi boltann fyrir og Birkir Eyþórsson skoraði.

Máni og Birkir voru aftur á ferðinni tuttugu mínútum síðar. Máni sendi á Birki sem átti skot í varnarmann og boltinn hafnaði í netinu.

Þegar skammt var til loka fyrri hálfleiks átti Bjarki Steinsen Arnarsson sendingu á Guðmund Tyrfingsson og hann kom boltanum yfir línuna. Stuttu síðar bætti Guðmundur við sínu öðru marki og fjórða marki Fylkis.

Njarðvík fékk vítaspyrnu þegar Theodór Ingi Óskarsson togaði Oumar Diouck niður inn í teignum. Bragi Karl Bjarnason skoraði úr vítinu og minnkaði muninn.

Diouck komst í gott færi þegar tíu mínútur voru til loka venjulegs leiktíma en skaut framhjá. Nær komust Njarðvíkingar ekki. Dagur Traustason hefði getað innsiglað sigur Fylkis í blálokin þegar Guy Smit fór í skógarúthlaup en Dagur skaut í varnarmann.

Fylkir er í 2. sæti með 30 stig, stigi á eftir Aftureldingu. Njarðvík er í 6. sæti með 20 stig.