Þau koma til greina sem fótboltafólk ársins - Tvö spila á Íslandi

KSÍ leitar til ríflega 500 einstaklinga sem tengst hafa fótboltanum á ýmsan átt til að aðstoða við val á fótboltamanni og fótboltakonu ársins. Úrslitin verða tilkynnt síðar í desember.

Hver og einn sem tekur þátt í valinu raðar þremur leikmönnum af hvoru kyni upp í 1.-3. sæti. 1. sæti gefur fimm stig, 2. sætið gefur þrjú stig og 3. sætið eitt stig í kjöfinu.

KSÍ hefur sett saman lista með 10 leikmönnum að hvoru kyni sem skarað hafa fram úr á árinu sem er að líða. Þeir sem kjósa geta þó bætt nafni eða nöfnum á sinn lista.

Höskuldur Gunnlaugsson, fyrirliði Íslandsmeistara Breiðabliks, er eini leikmaðurinn sem tilnefndur er sem ekki spilaði landsleik á árinu. Sandra María Jessen, sem varð markahæst í Bestu deildinni, er hinn leikmaðurinn á listanum sem spilar á Íslandi.