Hákon Arnar Haraldsson.
KSÍ hefur staðfest að íslenska landsliðið mætir Japan í vináttulandsleik á þjóðarleikvanginum í Tókýó þann 31. maí næstkomandi. Unnið er að því að íslenska liðið leiki annan vináttuleik í leikjaglugganum.
Af heimasíðu KSÍ:
Ísland og Japan hafa mæst þrisvar sinnum áður í A landsliðum karla og hafa Japanir unnið þrjá sigra.
Síðasta viðureign liðanna var í Osaka í febrúar 2012 og var það fyrsti leikur íslenska liðsins undir stjórn hins sænska Lars Lagerbäck. Leiknum lauk með 3-1 sigri heimamanna, og mark Íslands í leiknum skoraði Arnór Smárason.
Heiðar Helguson skoraði tvö mörk þegar japanska liðið vann 3-2 sigur á City of Manchester Stadium árið 2004. Brynjar Björn Gunnarsson fékk rautt spjald seint í leiknum.
Fyrsta viðureign liðanna var á Laugardalsvelli árið 1971 og unnu gestirnir þá tveggja marka sigur fyrir framan tæplega 6 þúsund áhorfendur. Ríkharður Jónsson var þjálfari íslenska liðsins.
Við þetta má bæta að A landslið karla lék æfingaleik við japanska félagsliðið Hitachi Reysol í mars 1994 og vann 2-1 sigur með mörkum frá Ólafi Þórðarsyni og núverandi þjálfara A landsliðs karla, Arnari Gunnlaugssyni.
Fram kemur í bók Víðis Sigurðssonar “Íslensk knattspyrna 1994” að íslenska liðinu hafi verið „boðið til Japans af þarlendu fjölmiðlafyrirtæki og áhorfendur voru um 18 þúsund, sem var vallarmet í bænum Nishikawada”.
Athugasemdir
