Ítalía: Þriðji sigur Fiorentina í röð

Fyrsti leikur dagsins í Serie A deildinni á Ítalíu er búinn en þar áttust við Genoa og Fiorentina.

Leiknum lauk með 2-1 sigri gestanna þar sem Riccardo Saponara gerði fyrsta markið eftir klukkutíma leik eftir sendingu frá Giacomo Bonaventura. Heimamenn í Genoa vildu fá vítaspyrnu stuttu síðar og botnuðu ekkert í því afhverju VAR steig ekki inn í.

Það var síðan Giacomo Bonaventura sem skoraði undir lok leiks og nú eftir sendingu frá Saponara. Virðast ná vel saman þessir tveir.

Domenico Criscito tókst að klóra í bakkann af vítapunktinum en það var jafnframt síðasta spyrna leiksins.

Fiorentina tapaði sínum fyrsta leik í deildinni gegn AS Roma en síðan þá hefur liðið unnið þrjá í röð og er komið með níu stig á töfluna. Genoa er hins vegar með aðeins þrjú stig.