Þýskaland: Cole Campbell með glæsilegt mark

Cole Campbell byrjaði á bekknum er Elversberg tók á móti Mainz í fyrsta leik helgarinnar í efstu deild þýska boltans.

Nýliðar Elversberg byrjuðu af miklum krafti og leiddu 3-0 í leikhlé eftir mörk frá Felix Keidel, Francis Onyeka og Maurice Krattenmacher.

Keidel skoraði laglegt mark beint úr aukaspyrnu áður en Onyeka tvöfaldaði forystuna. Krattenmacher skoraði þriðja markið í kjölfar hornspyrnu sem Mainz mistókst að hreinsa frá marki.

Cole kom inn af bekknum á 77. mínútu og lét til sín taka í uppbótartíma þegar hann setti fjórða og síðasta mark heimamanna eftir frábært framtak. Hann fann sér góða stöðu í vítateignum eftir laglegt samspil við tvo liðsfélaga og fékk boltann til sín í erfiðri hæð, snúandi baki í markið.

Cole gerði mjög vel að taka á móti boltanum með bringunni áður en hann skoraði með glæsilegri klippu. Mínútu síðar minnkuðu gestirnir muninn niður í 4-1 og urðu það lokatölurnar.

Elversberg var sterkara liðið í dag og nýtti færin sín til hins ítrasta. Liðið er afar óvænt í 5. sæti í Bundesliga með 13 stig eftir 8 umferðir og situr Mainz eftir með 10 stig eftir fína byrjun á tímabilinu.