Ísak lagði upp dýrmætt sigurmark

Ísak Snær var í byrjunarliðinu ásamt hinum 19 ára Davíð Smára Aronssyni og kom Daníel Freyr Kristjánsson inn af bekknum undir lokin.

Ísak lagði sigurmark leiksins upp á 69. mínútu fyrir hinn bandaríska Markus Anderson sem var nýlega kominn inn af bekknum. Lokatölur 2-1 og er Lyngby 11 stig eftir 13 umferðir.

Þetta var aðeins annar sigur Lyngby á deildartímabilinu og situr liðið í næstneðsta sæti deildarinnar.

Í næstefstu deild lék Nóel Atli Arnórsson fyrri hálfleikinn í jafntefli hjá Álaborg gegn Hobro. AaB er um miðja deild, með 15 stig eftir 13 umferðir.

Amin Cosic fékk þá að spila síðustu sekúndurnar í tapi Viking í toppslagnum gegn Bodö/Glimt í efstu deild í Noregi.

Bodö/Glimt vann 3-2 og eru liðin jöfn á stigum í titilbaráttunni, með 59 stig eftir 25 umferðir. Spennan er því gríðarlega mikil þegar fimm umferðir eru eftir.

Ef stórveldin enda jöfn á toppi deildarinnar er það markatalan sem gildir, en eins og staðan er í dag þá er markatalan jöfn.

Því næst er litið til skoraðra marka og þar hefur Viking vinninginn sem stendur - með 64 mörk skoruð gegn 61 marki hjá Glimt.

Ef liðin enda með eins markatölu þá verður litið til innbyrðisviðureigna, og þar hafa Amin og félagar í liði Viking vinninginn eftir að hafa unnið fyrri leikinn 5-0 á heimavelli.

Að lokum var Aron Einar Gunnarsson ekki í hóp vegna meiðsla er liðsfélagar hans í Qatar SC töpuðu fyrir gömlu vinnuveitendum Arons í liði Al-Gharafa. Lokatölur 2-0.

Qatar SC er í næstneðsta sæti katörsku deildarinnar með 6 stig eftir 8 umferðir.

Lyngby 2 - 1 Randers

Aalborg 1 - 1 Hobro

Bodö/Glimt 3 - 2 Viking

Al-Gharafa 2 - 0 Qatar SC