Spánn: Sociedad skellti Betis - Huesca kom til baka

Jafnræði ríkti með liðunum stærsta hluta leiksins en afar lítið var um færi. Cristian Portu kom Sociedad yfir undir lok fyrri hálfleiks og náði Betis að koma knettinum í netið í síðari hálfleik en markið dæmt af vegna ótrúlega tæprar rangstöðu. Leikmaður Betis var með olnbogann fyrir innan aftasta varnarmann gestanna.

Betis reyndi að sækja sér jöfnunarmark en gestirnir áttu stórhættulegar skyndisóknir og bættu tveimur mörkum við á lokakaflanum. Adnan Januzaj gerði síðasta markið, hann kláraði þröngt færi með föstu skoti í þaknetið.

Sociedad er á toppi deildarinnar með ellefu stig eftir sex umferðir. Betis er með níu stig.

Real Betis 0 - 3 Real Sociedad
0-1 Cristian Portu ('43 )
0-2 Mikel Oyarzabal ('74 , víti)
0-3 Adnan Januzaj ('88 )

Huesca lenti þá tveimur mörkum undir gegn Real Valladolid en náði að koma til baka og jafna. Sandro Ramirez, fyrrum leikmaður Everton, gerði jöfnunarmarkið.

Að lokum hafði Elche betur á útivelli gegn Alaves.

Stöðuna í deildinni má sjá hér fyrir neðan.

Huesca 2 - 2 Valladolid
0-1 Bruno Gonzalez ('34 )
0-2 Waldo Rubio ('51 , víti)
1-2 Rafa Mir ('52 )
2-2 Sandro Ramirez ('56 )

Alaves 0 - 2 Elche
0-1 Pere Milla ('39 )
0-2 Tete Morente ('86 )