Hefur verið í stjórn D/R síðustu misseri.
Að störfum á ársþingi KSÍ í febrúar á þessu ári.
Hörður hefur starfað sem fjölmiðlamaður í kringum fótbolta í tæpa tvo áratugi. Hann er í dag ritstjóri 433.is og mun halda því starfi áfram.
„Það er öðruvísi að vera hinu megin við hljóðnemann, en samt hrikalega spennandi, það hefur blundað í manni í svolítinn tíma að prófa þetta. Þetta er kannski svolítið bratt að byrja í meistaraflokki, en ég ákvað að kýla bara á þetta," sagði Hörður Snævar Jónsson, nýr þjálfari Dalvíkur/Reynis, við Fótbolta.net eftir æfingu liðsins í Boganum í gærkvöldi.
„Þessi hugmynd kom upp fyrir tveimur vikum og það var að hrökkva eða stökkva. Ég er búinn að vera blaðamaður í nítján ár og búinn að vinna lengi í þeim hluta og verð áfram. Ég hef verið að pæla í að demba mér út í þjálfun, er búinn að taka fyrstu þrjú stigin hjá KSÍ. Þetta kom upp núna og ég vildi kýla almennilega á þjálfunina og er spenntur fyrir því. Ég er búinn að búa á Dalvík í eitt og hálft ár, þar er hrikalega flotta aðstaða, flottur kjarni af leikmönnum. Þetta er djúp laug en held þetta sé fínn staður til að byrja og félagið tilbúið að treysta á mig."
Hvaða box þurfti að tikka í til að segja já við starfinu?
„Í fyrsta lagi er ég í 100% vinnu, þurfti að tékka á vinnuveitandanum og það kom jákvætt svar þaðan. Ég er með konu og þrjú börn, er í lagi að ég verði meira að heiman en ég hef verið? Það var í lagi líka, fæ mikinn stuðning þaðan. Ég hef einhverjar hugmyndir um hvernig ég vil gera þetta og eftir að hafa melt það, og stjórnin var til í þetta, þá var ekkert annað en að taka slaginn."
Hörður er ritstjóri 433.is og mun sinna því hlutverki áfram. Hann hefur verið í stjórn Dalvíkur/Reynis undanfarin tvö sumur.
„Það er sennilega einsdæmi að maður úr stjórn sé fenginn í svona verkefni. Það var stjórnarfundur fyrir tveimur vikum, nokkrum klukkutímum sendi framkvæmdastjóri félagsins mér skilaboð, þá komnar sex vikur frá því að Lengjudeildinni lauk. Við vorum að velta fyrir okkur þjálfaramálunum og hann sendi kalt á mig hvort ég væri klár í að skoða þetta. Ég var til í að kíkja á það og í kjölfarið var mér bannað að mæta á stjórnarfundinn um kvöldið. Þar fóru menn yfir stöðuna og þetta varð niðurstaðan."
„Ég er reynslulaus og því þurfti að finna ákveðið jafnvægi. Moli (Siguróli Kristjánsson) ætlar að vara í kringum þetta með okkur, vera minn mentor fram eftir tímabili og vonandi lengur. Ég skrifaði undir í gær (mánudag) og fyrsta æfing í dag."
„Það voru margir hissa. En svo voru líka margir þjálfarar sem maður hefur talað við í gegnum tíðina ánægðir með þetta skref, hvetjandi og hafa trú á manni."
„Það er heldur betur ekki sjálfgefið að fá þetta traust. Ég er 34 ára gamall að fara í fyrsta meistaraflokks giggið og það hjá félagi sem var að koma úr Lengjudeildinni. Það er búinn að vera mikill uppgangur hjá félaginu síðustu ár eftir að það fékk gervigrasvöll. Það gleymist að félagið fór upp um tvær deildir á tveimur árum. Ég er mjög stoltur að félagið sé til í að veðja á mig og ég þarf núna að bretta upp ermar og vinna mikið til að borga traustið til baka," segir Hörður.
Stefna D/R er að enda í efri helmingi 2. deildar á næsta tímabili og þegar nær dregur verður mögulega frekara markmið sett. Liðið var í 3. deild 2022, 2. deild 2023, Lengjudeildinni 2024 en féll úr henni, næstefstu deild, í sumar.
Viðtalið í heild er lengra og má sjá í spilaranum efst.
