Ítalía: Kulusevski bjargaði stigi fyrir Juventus

Margfaldir Ítalíumeistarar Juventus náðu ekki að sigra gegn Verona er liðin mættust í síðasta leik dagsins í Serie A.

Juve var við stjórn stærsta hluta leiksins og kom Alvaro Morata knettinum í netið undir lok fyrri hálfleiks en markið fékk ekki að standa vegna naumrar rangstöðu.

Andrea Favilli kom Verona yfir með marki eftir skyndisókn í síðari hálfleik og juku heimamenn sóknarþungan í kjölfarið. Paulo Dybala átti skot í slá skömmu áður en Dejan Kulusevski gerði fallegt jöfnunarmark. Svíinn knái gerði frábærlega að koma sér í skotfæri undir pressu frá Davide Faraoni og kláraði með laglegu skoti.

Juve reyndi að ná í sigurinn á lokakaflanum en tókst ekki þrátt fyrir hættulegar sóknir. Lokatölur urðu 1-1 og er Juventus með 9 stig eftir 5 umferðir. Verona er með 8 stig. Ítalíumeistararnir geta þakkað Svíanum sínum fyrir stigið gegn sterku varnarliði eins og Verona sem hefur aðeins fengið tvö mörk á sig hingað til.

Lærisveinar Andrea Pirlo hafa aðeins unnið einn leik og gert þrjú jafntefli í deildinni, auk þess að fá gefins sigur gegn Napoli sem mætti ekki til leiks í byrjun október vegna Covid.

Kulusevski hefur farið vel af stað hjá Juventus og er kominn með tvö mörk í fjórum deildarleikjum.