Besta deildin: Markalaust í Akureyrarslagnum

Nágrannarnir í KA og Þór gerðu markalaust jafntefli í hörkuleik í 16. umferð Bestu deildar karla á Greifavellinum í kvöld.

Það sauð upp úr þegar liðin mættust fyrr á tímabilinu í leik sem einkenndist af látum og fjölda aukaspyrna. KA hafði þá betur, 1-0, eftir vítaspyrnumark Hallgríms Mars Steingrímssonar undir lokin.

Ný stúka KA var vígð fyrir leikinn og var þétt setið þegar flautað var til leiks. Heimamenn byrjuðu mun betur og réðu ferðinni lengst af í fyrri hálfleiknum.

Það vantaði þó herslumuninn framan af. KA-menn fóru að skapa sér hættulegri færi þegar leið að hálfleik. Jakob Héðinn Róbertsson fann Hallgrím Mar sem lagði boltann aftur á Jakob en Aron Birkir Stefánsson varði skot hans.

Nokkrum mínútum síðar lét nafni hans, Jakob Snær Árnason, vaða fyrir utan vítateiginn en boltinn small í þverslánni.

Mörkin létu á sér standa en spennan var mikil. Lítið var um færi framan af síðari hálfleik en Þórsarar sóttu í sig veðrið þegar leið á og komst Atli Sigurjónsson í ágætis stöðu en fór illa með hana og þá kom Valdimar Logi Sævarsson með hörku innkomu af bekknum.

Hvorugu liðinu tókst að brjóta ísinn og markalaust jafntefli varð niðurstaðan í þessum erkifjendaslag. KA er í níunda sæti með 15 stig en Þór situr á botninum með 12 stig.