Viktor að skapa sér risastórt nafn í Evrópu - „Hefur allt að bera til að sigra heiminn“

„Frábært slútt og algjörlega geggjuð sending sem hann fær þarna. Hann hækkaði í verði um dágóða summu með því að spila þennan leik og skora þetta mark," segir Sigurbjörn Hreiðarsson, sérfræðingur Sýnar, í markaþættinum í kvöld.

Arnar Gunnlaugsson landsliðsþjálfari var á leiknum í Barcelona í kvöld.

„Hann hlýtur að komast inn í íslenska landsliðið, hann hlýtur að hafa unnið sig þar inn. Það getur ekki annað verið. Hann verður á milli tannana á fólki. Þetta er demantur, það er ekki nokkur spurning," segir Sigurbjörn.

Gamli markahrókurinn Atli Viðar Björnsson var einnig sérfræðingur í sjónvarpssal Sýnar.

„Hann er að skapa sér risastórt nafn í Evrópu. Þetta er sautján ára gæi sem er búinn að skora þrjú mörk í Meistaradeild Evrópu og var að skora á Nou Camp. Hann hefur allt að bera til að skapa sér risastórt nafn og sigra heiminn á næstu misserum," segir Atli.

„Ég er rosalega hrifinn af því hvað hann er fjölhæfur. Hann er góður með bakið í markið, góður að staðsetja sig inni í teig og góður í að slútta færunum sínum. Sem 'target-stræker' hefur hann rosalega mikið að bera."

„Það er vika eftir af glugganum í Evrópu, er nokkuð útilokað að það komi eitthvað stórlið og sæki hann bara núna? Eða erum við að sjá hann fara í sumar? Svo er spurning hver er rétta leiðin fyrir hann."