Magnús Már Einarsson, þjálfari Aftureldingar.
Afturelding fagnar sæti sínu í úrslitaleiknum.
Maggi á hliðarlínunni.
„Það er mikil spenna fyrir leiknum, að sjálfsögðu. Maður finnur það í Mosfellsbæ að stuðningsmennirnir eru spenntir. Við höfum undirbúið okkur vel," sagði Magnús Már Einarsson, þjálfari Aftureldingar, í viðtali við Fótbolta.net í dag.
Á laugardaginn spilar Afturelding til úrslita í umspilinu í Lengjudeildinni er liðið mætir Vestra á Laugardalsvelli.
Á laugardaginn spilar Afturelding til úrslita í umspilinu í Lengjudeildinni er liðið mætir Vestra á Laugardalsvelli.
„Tímabilið hefur verið frábært hjá okkur en við viljum meira. Síðasti leikurinn er á laugardag og við ætlum að klára það."
Afturelding var lengi vel í toppsæti Lengjudeildarinnar en liðið missti dampinn aðeins seinni hluta deildarinnar og endaði að lokum í öðru sæti. Mosfellingar unnu Leikni í undanúrslitunum og mæta núna Vestra í úrslitunum.
„Seinni hluti tímabilsins var skrítinn úrslitalega séð. Mér fannst við spila fína leiki og við áttum meira skilið, en fótboltinn er svona. Oft er þetta ekki alveg sanngjarnt. Ég vissi það að við gætum komist aftur á flug. Við lítum á þetta sem nýtt mót en við höfum unnið báða leikina í þessu móti og markatalan er 5-1. Við eigum einn leik eftir í þessu móti og við verðum að klára hann vel."
Nýtt fyrirkomulag
Þetta er nýtt fyrirkomulag í Lengjudeildinni en Afturelding væri komið upp í Bestu deildina í gamla fyrirkomulaginu. Hvað finnst Magga um þetta?
„Mér finnst þetta geggjað. Ég sagði fyrir mót að mér fyndist það alveg eins virði að prófa það. Ég held að það séu alltaf fleiri og fleiri að hrífast af þessari hugmynd. Þetta verður hörkuleikur á móti góðu liði," segir Maggi.
„Við erum búnir að ýta einni hindrun úr vegi og þurfum að klára Vestra til að fara alla leið."
Þetta verður stærsti leikurinn á þjálfaraferli Magga til þessa. Hvernig gengur að halda taugunum í góðu lagi?
„Bara þokkalega. Það er full einbeiting á að undirbúa leikinn. Það hefur gengið vel í vikunni, mjög vel. Maður er spenntur en ég sef alveg rólegur á næturnar. Það verður gaman að takast á við þetta fyrst og fremst, og gaman fyrir alla Mosfellinga. Þetta verður stór dagur fyrir bæjarfélagið."
Leikurinn hefur fengið gælunafnið '50 milljóna króna leikurinn' en búið er að reikna út að sigurliðið muni fá 50 milljónir aukalega í tekjur með því að komast upp. Er það aukin pressa?
„Nei, alls ekki. Ég held að það sé bara einhver leikur að tölum. Ég held að það sé ekki hægt að setja svoleiðis verðmiða á þetta. Ég og strákarnir erum ekki að fara að fá 50 milljónir í vasann ef við vinnum leikinn og ég er ekki svo viss um að félagið geri það heldur. Það eina sem skiptir máli er að spila þennan leik og okkur langar að gera það til að ná markmiði okkar, að fara í Bestu deildina."
Hægt er að hlusta á viðtalið í heild sinni hér að ofan.
Athugasemdir
