Tuchel óskar Leverkusen til hamingju - „Titilbaráttunni er lokið“

Bayern tapaði fyrir erkifjendum sínum í Borussia Dortmund í dag, 2-0, og er nú þrettán stigum á eftir toppliði Bayer Leverkusen þegar sjö umferðir eru eftir.

Tuchel talaði hreint út þegar hann var spurður út í titilbaráttuna og hvaða þýðingu þetta tap hefur fyrir liðið.

„Ég vil óska Bayer Leverkusen innilega til hamingju. Titilbaráttunni er lokið,“ sagði Tuchel.

Bayern hefur unnið titilinn síðustu ellefu ár og samtals átján sinnum á þessari öld. Það stefnir í að Bayer Leverkusen taki sinn fyrsta titil í sögunni, en fimm sinnum hefur liðið hafnað í öðru sæti.