Úrvalsdeildarfélögin vilja að Man City sé refsað sem fyrst

Man City heldur fram sakleysi sínu og ætlar að áfrýja málinu, en gögnin tala sínu máli og á félagið yfir höfði sér mjög alvarlegar refsingar og jafnvel lögsóknir.

Ensku úrvalsdeildarfélögin vilja sjá City vera refsað sem fyrst, helst á yfirstandandi keppnistímabili. Mögulegt er að félagið verði dæmt niður um deild eða deildir og þurfi að borga himinhá sektargjöld bæði til ensku úrvalsdeildarinnar og keppinauta sinna í deildinni - félagsliða sem töpuðu efnahagslega á velgengni City.

Félagið er sakað um ýmsa hluti, meðal annars að hafa logið til um rúmlega 900 milljónir punda sem komu til félagsins í auglýsinga- og styrktargreiðslur á árunum 2009 til 2018. Eigendur Man City borguðu reikningana fyrir styrktaraðila sína og fóru þannig framhjá fjármálareglum úrvalsdeildarinnar. Þeir dældu peningum inn í félagið með ólögmætum hætti og lugu svo til um það og hylmdu yfir. Þá á eftir að rannsaka hegðun félagsins á árunum eftir 2018.

Man City ætlar að áfrýja og eru úrvalsdeildarfélögin smeyk um að áfrýjunarferlið muni taka alltof langan tíma. Þess vegna heimta félögin að málið verði leyst á yfirstandandi keppnistímabili.

Auk City hefur flugfélagið Etihad Airways, helsti styrktaraðili Man City í eigendatíð Sheikh Mansour, lýst yfir furðun sinni á niðurstöðu óháðrar rannsóknarnefndar sem fór yfir málið og hótað að lögsækja ensku úrvalsdeildina.