Ætlar ekki að breyta leikstílnum þrátt fyrir tapið

Spánarmeistararnir tróna enn á toppi deildarinnar þrátt fyrir tapið, með 27 stig eftir 10 umferðir, en eru aðeins með tveggja stiga forystu á Atlético Madrid og þriggja stiga forystu á Real.

„Okkur finnst alls ekki gaman að tapa gegn Real Madrid, en við verðum að samþykkja tapið og læra af því. Það er ekki auðvelt þegar fjórir varnarmenn eru meiddir á sama tíma, við höfum verið að reyna að finna lausnir. Vonandi getum við bætt miðverði við hópinn í janúar," sagði Flick á fréttamannafundi í dag, áður en hann var spurður út í leikstílinn sóknarþenkjandi sem hann lætur liðið sitt spila - sem felur í sér að vera með gríðarlega háa varnarlínu. Ekki ósvipað varnarstílnum sem Ange Postecoglou vildi nota hjá Tottenham.

„Við erum ekki að fara að breyta okkar leikstíl eða hugarfari, við munum halda áfram að spila okkar fótbolta."

Flick var meðal annars spurður út í Frenkie de Jong og Alejandro Balde sem tóku báðir þátt í tapinu gegn Real Madrid. De Jong er nýkominn úr meiðslum á meðan Balde hefur fengið afar lítinn spiltíma í haust.

De Jong er 29 ára miðjumaður með tæp þrjú ár eftir af samningi við Barca, á meðan Balde er 23 ára og með tæp tvö ár eftir af samningi.

„Ég er fullkomlega sannfærður um að Frenkie de Jong sé nógu góður fyrir liðið. Hann er stórkostlegur leikmaður þegar hann er heill heilsu, hann er mjög mikilvægur partur af liðinu þegar hann er upp á sitt besta. Hann gerir leikmenn í kringum sig betri.

„Það vantar aðeins upp á sjálfstraustið hjá Balde þessa stundina. Þegar sjálfstraustið kemur aftur þá verður hann upp á sitt besta."