Félagaskipti Martin Ödegaard til Real Madrid eru aðalumræðuefni dagsins í boltanum. Í tilefni þessara frétta setti Daily Mail saman lista yfir tíu leikmenn sem þóttu afar efnilegir og spennandi á sínum tíma en náðu svo ekki að standa undir væntingunum.
Freddy Adu - Það þekkja allir söguna af Adu sem skrifaði undir atvinnumannasamning við DC United þegar hann var 14 ára. Hann er í dag 25 ára og félagslaus en með 400 þúsund fylgjendur á Twitter.
Cherno Samba - Spilaði fyrir öll yngri landslið Englands og var sterklega orðaður við Liverpool á sínum tíma. Þegar Millwall gafst upp á honum fór hann á flakk milli smáliða en er nú 29 ára og samningslaus.
Nii Lamptey - Ganverjinn var valinn bestur á HM unglingalandsliða. Hann fór 16 ára til Anderlecht, varð síðan markakóngur hjá PSV Eindhoven áður en Aston Villa keypti hann. Hann floppaði þar og reyndi svo sjö mismunandi lönd en allstaðar gekk illa.
Sonny Pike - Fékk gríðarlega athygli aðeins sjö ára gamall þegar Ajax fékk hann til sín. Þoldi ekki athyglina og pressuna og þurfti sálfræðimeðferð. Lagði skóna á hilluna 2003 og ákvað að skrá sig í skóla og lifa venjulegu lífi.
Michael Johnson - Meðfylgjandi mynd segir allt. Michael Johnson var spáð frægð og frama og stuðningsmenn Manchester City héldu ekki vatni. Hann höndlaði ekki pressuna auk þess sem hnémeiðsli settu strik í reikninginn.
Federico Macheda - 17 ára gamall sló hann í gegn með Manchester United þegar hann skoraði dramatískt sigurmark gegn Aston Villa. Náði samt ekki að festa sig í sessi og var lánaður hingað og þangað. Er nú 23 ára og reynir að koma ferlinum á beinu brautina hjá Cardiff.
Savio Nsereko - Keyptur til West Ham meðan Íslendingarnir áttu félagið. Þýskur unglingalandsliðsmaður sem var lánaður hingað og þangað en floppaði allstaðar áður en hann fór til Kasakstan. Var síðar handtekinn í Pattaya í Tælandi þegar hann setti á svið mannrán á sjálfum sér til að reyna að plata lausnargjald út úr foreldrum sínum.
Kerlon - Brasilíski strákurinn með selatrikkið (gat hlaupið áfram með boltann "límdan" á höfðinu) var keyptur til Inter. Það gekk ekki samkvæmt plani. Spilar nú hjá Weymouth Wales í Barbados.
Nicklas Bendtner - Mörgum þykir kannski ósanngjarnt að setja Bendtner á þennan lista. En hann var talinn einn efnilegasti sóknarmaður heims og spilaði sinn fyrsta leik fyrir Arsenal 17 ára gamall. Enginn skilur hvaðan hann fær óbilandi sjálfstraust sitt.
Anderson - Gerði alla stuðningsmenn Manchester United afar spennta þegar hann var keyptur frá Porto. En hann hefur meira látið til sín taka á skyndibitastöðum en á fótboltavellinum.
Athugasemdir
