Hemmi Hreiðars: James líst mjög vel á Vestmannaeyjar

David James var við hlið Hermanns á bekknum hjá ÍBV í dag en hann hefur átt í viðræðum um að gerst spilandi aðstoðarþjálfari hjá liðinu.

James kíkti á aðstæður í Vestmanneyjum um helgina og það skýrist á næstu dögum hvort hann semji við Eyjamenn eða ekki.

,,Honum leist mjög vel á. Það líst öllum vel á allt í Vestmannaeyjum,\" sagði Hermann.

,,Þetta lítur ágætlega út. Það er ekkert alveg klárt, hann er með ákveðnar skuldbindingar sem við erum að bíða eftir. Það verður að gerast á næstu dögum, það er lykilatriði.\"

ÍBV er á leið í æfingaferð til Englands þar sem liðið spilar meðal annars við Portsmouth og varalið Bournemouth en James mun taka þátt í þeirri ferð að hluta ef hann semur við ÍBV.

Gæti fengið frekari liðsstyrk:
Hermann er einnig að leita að frekari liðsstyrk fyrir sumarið. ,,Já, það er stefnt að því. Það eru alls ekkert margir leikmenn. Það kemur bara í ljós, það er ekkert hægt að segja um það.\"

Hermann er í sínu fyrsta starfi sem þjálfari og hann er spenntur fyrir sumrinu.

,,Ég hef haft mjög gaman af þessu hingað til og ég er fyrst og fremst spenntur. Þetta á eftir að verða gaman hjá okkur, það er alveg á hreinu.\"

Kemur sér í form í júlí:
Hermann hefur ekki spilað með ÍBV í vetur en hann fékk þó leikheimild með liðinu á dögunum.

,,Maður fer að koma sér í form í júlí. Fyrsti leikur verður þá, rétt fyrir þjóðhátíð,\" sagði Hermann léttur í bragði að lokum.

Hér að ofan má sjá viðtalið við Hermann í heild sinni.