Alonso segir Chelsea á réttri leið - „Ég geri miklar kröfur“

Chelsea hefur farið ágætlega af stað á tímabilinu, en frammistaða liðsins hefur þó verið langt frá því að vera frábær.

Liðið er nú aðeins eftir í einni keppni eftir að hafa fallið úr leik í deildabikarnum á dögunum og því fer öll einbeitingin í að tryggja sér sæti á meðal fimm efstu liðanna í ensku úrvalsdeildinni.

Alonso gat tekið margt jákvætt úr frammistöðunni gegn United, en hann er sannfærður um að liðið eigi eftir að sýna mun betri takta á lokamánuðum tímabilsins.

„Við erum ánægðir. Leikurinn var kaflaskiptur og það var mikið jafnræði með liðunum í fyrri hálfleik þar sem bæði lið fengu sín færi.“

„Við ræddum það í hálfleik að halda stjórn á leiknum og að við myndum vinna ef okkur tækist að halda boltanum. Þetta var mjög þroskuð frammistaða.“

„Ég geri miklar kröfur. Við getum gert betur, en við erum að taka skref í rétta átt. Það er hins vegar erfitt að segja nákvæmlega hversu langt við erum komnir.“

„Væntingar mínar eru miklar og ég er sannfærður um að síðustu þrír mánuðir tímabilsins verði mun betri,“ sagði Alonso.

Brasilíumaðurinn Estevao hefur fengið fá tækifæri til að sanna sig fyrir Alonso, en hann fékk sæti í byrjunarliðinu í gær og þakkaði traustið með frábærri frammistöðu.

„Estevao stóð sig mjög vel og ég er ánægður fyrir hans hönd. Hann átti þetta tækifæri skilið og nýtti það til að sýna hvað í honum býr. Með þessari frammistöðu hefur hann fært enn sterkari rök fyrir því að hann eigi að fá fleiri mínútur,“ sagði hann ennfremur.