FCK aftur á sigurbraut - Arnór lék allan leikinn

FCK vann 0-2 gegn Sönderjyske og fékk Viktor Bjarki að spila síðustu 20 mínútur venjulegs leiktíma. Honum var skipt inn fyrir Andreas Cornelius sem skoraði seinna mark FCK undir lok fyrri hálfleiks.

Gunnar Orri Olsen og Rúnar Alex Rúnarsson voru ónotaðir varamenn í liði FCK á meðan Brynjar Ingi Bjarnason sat á bekknum hjá Sönderjyske.

Kaupmannahöfn er í öðru sæti dönsku deildarinnar með 29 stig eftir 13 umferðir, tveimur stigum á eftir toppliði Midtjylland sem er með Elías Rafn Ólafsson á milli stanganna. Sönderjyske vermir botnsætið, með 8 stig. Þetta var fyrsti sigur FCK í síðustu fjórum deildarleikjum.

Arnór Sigurðsson lék þá allan leikinn í jafntefli hjá Kalamata í gríska boltanum. Kalamata var talsvert sterkari aðilinn á heimavelli en tókst ekki að sigra, svo liðið er með 11 stig eftir 9 umferðir.

Í Póllandi kom Davíð Kristján Ólafsson inn af bekknum í dramatísku jafntefli Polonia Warszawa gegn LKS Lodz í toppbaráttu næstefstu deildar. Polonia jafnaði í uppbótartíma og deilir toppsætinu með LKS, þar sem bæði lið eiga 22 stig eftir 13 umferðir.

Róbert Frosti Þorkelsson er meiddur og var því ekki með í sigri GAIS gegn AIK í efstu deild í Svíþjóð. Þar siglir liðið lygnan sjó um miðja deild þegar aðeins þrjár umferðir eru eftir af deildartímabilinu.

Katla Tryggvadóttir og Iris Ómarsdóttir voru að lokum í byrjunarliði Fiorentina í efstu deild á Ítalíu. Katla lék allan leikinn í tapi gegn sterku liði Juventus, þar sem lokatölur urðu 1-2.

Fiorentina er með 7 stig eftir 5 umferðir, einu stigi á undan Juve sem hefur farið illa af stað í haust.

Sonderjyske 0 - 2 Kobenhavn

Kalamata 1 - 1 Iraklis 1908

LKS Lodz 1 - 1 Polonia Warszawa

GAIS 2 - 1 AIK

Fiorentina 1 - 2 Juventus