Gunnar Vatnhamar á förum frá Víkingi

Óvíst er hvenær Gunnar yfirgefur Víkinga. Leikjadagskráin hjá Íslandsmeisturunum er þétt þessa dagana, liðið er á leið í einvígi gegn svissnesku meisturunum í Thun og á milli Evrópuleikjanna er deildarleikur gegn ÍBV þar sem fyrirliðinn og félagi Gunnars í hjarta varnarinnar, Oliver Ekroth, verður í leikbanni.

Vejle er í næstefstu deild Danmerkur eftir að hafa fallið úr úrvalsdeildinni í vor. Liðið er með fjögur stig eftir tvær umferðir.

Erlingur á förum og Kjartan Kári í Víkina?
Það verður að teljast ansi líklegt að Víkingur reyni að fá inn mann í hópinn í stað Gunnars en félagaskiptaglugginn í Bestu deildinni er opinn út 12. ágúst.

Heyrst hefur af því að Erlingur Agnarsson, sem hefur verið í takmörkuðu hlutverki á tímabilinu, gæti verið á förum fyrir lok gluggans. Hann hefur verið orðaður við FH og Keflavík.

Heyrst hefur af mögulegum skiptidíl milli Víkings og FH þar sem Erlingur færi í FH og Kjartan Kári Halldórsson færi í Víking. Ef af yrði þá fengi FH einnig væna greiðslu frá Víkingi. Vængmaðurinn Kjartan Kári hefur áður verið orðaður við Víking.

Í síðustu viku varð Víkingur fyrir áfalli þegar vængmaðurinn Óskar Borgþórsson ökklabrotnaði og hnéskel Tariks Ibrahimagic fór úr lið. Óskar verður frá út tímabilið og Tarik spilar ekki næstu níu mánuðina hið minnsta.