Frakkland: Hákon og Lille stálu sigrinum

Hákon Arnar Haraldsson var í byrjunarliði Lille og lék allan leikinn í afar naumum sigri á útivelli gegn Toulouse í efstu deild franska boltans í kvöld.

Heimamenn í Toulouse voru talsvert sterkari aðilinn og sköpuðu mikið af góðum færum, en tyrkneski markvörðurinn Berke Özer átti stórleik á milli stanganna. Hann varði ellefu bolta til að halda markinu hreinu á meðan liðsfélagar hans í Lille sköpuðu ekki jafn góð færi.

Hákon og félagar sköpuðu sér þó einhver færi og nýtti Japaninn Ayase Ueda eitt þeirra á 73. mínútu. Það var smá heppnisstimpill yfir markinu þar sem Ueda náði að fylgja eigin marktilraun eftir með skalla af stuttu færi.

Toulouse tókst ekki að gera jöfnunarmark á lokakaflanum svo lokatölur urðu 0-1. Lille er með sjö stig eftir þrjár fyrstu umferðirnar á nýju tímabili. Toulouse situr eftir með eitt stig.