Simeone: Kane bætir ímynd fótboltans

Stórveldin eigast við í fjórðu umferð Meistaradeildar Evrópu og er eitt stig sem skilur á milli þeirra. Atlético er með fjögur stig eftir tap gegn Liverpool og jafntefli við Stuttgart, einu stigi minna en Bayern sem gerði jafntefli við Arsenal eftir að hafa gert óvænt jafntefli við Viking í Noregi.

Harry Kane er skærasta stjarna Bayern og vann hann Ballon d'Or verðlaunin á dögunum.

„Ég vil óska Harry Kane til hamingju með Ballon d'Or, hann átti heldur betur skilið að vinna. Hann er ótrúlegur leikmaður sem mér hefur alltaf líkað vel við. Hann er búinn að þroskast mikið sem leikmaður í gegnum árin og er mikill liðsmaður. Hann bætir ímynd fótboltans og er alvöru fyrirmynd fyrir börn. Hann skilur mikilvæga arfleifð eftir sig og sannar fyrir unga iðkendur að það er hægt að ná mjög langt í gegnum þrotlausa vinnu," sagði Simeone.

„Það er alltaf erfitt að spila við FC Bayern, við munum án nokkurs vafa lenda í erfiðleikum á móti þessu liði. Þeir eru rosalega góðir að pressa og við munum þurfa á miklum stuðningi að halda frá áhorfendapöllunum."

Atlético hefur farið vel af stað í spænsku deildinni og situr í öðru sæti með 28 stig eftir 11 umferðir, tveimur stigum á eftir Spánarmeisturum Barcelona og einu stigi fyrir ofan Real Madrid.

Simeone ræddi meðal annars Ademola Lookman á fundinum, sem er aðeins kominn með tvö mörk og eina stoðsendingu í fjórtán leikjum.

„Lookman er mikilvægur fyrir sóknarleikinn okkar og ég ber mikið traust til hans. Mörkin eru ekki að koma núna en hann má ekki leyfa því að trufla sig. Hann verður að halda áfram að leggja hart að sér og bíða eftir að mörkin láti sjá sig á ný."

29 ára Lookman hefur komið með beinum hætti að 16 mörkum í 38 leikjum frá félagaskiptunum til Atlético síðasta vetur.