Elías í leik með Víkingi á undirbúningstímabilinu.
Elías Már Ómarsson var meðal markaskorara Víkings sem vann 4-2 útisigur á Fram og kom sér þar með í 16-liða úrslit Mjólkurbikarsins. Elías gekk í raðir Víkings í vetur og leiddi sóknarlínu liðsins í leiknum í kvöld.
„Ég er mjög sáttur við að fá 90 mínútur og sérstaklega ánægjulegt að vinna leikinn," segir Elías en það er mikil samkeppni um stöðu í Víkingsliðinu eins og fjallað hefur verið mikið um.
„Ég er mjög sáttur við að fá 90 mínútur og sérstaklega ánægjulegt að vinna leikinn," segir Elías en það er mikil samkeppni um stöðu í Víkingsliðinu eins og fjallað hefur verið mikið um.
Lestu um leikinn: Fram 2 - 4 Víkingur R.
„Það er alltaf gott sem framherji að skora mark. Það hjálpar sjálfstraustinu. Ég er ánægður með að hafa sett mark í dag. Það er gott fyrir hópinn að hafa samkeppni. Við erum með sterkt lið og það geta allir í hópnum verið í fyrstu ellefu."
Nikolaj Hansen skoraði tvö mörk gegn Vestra í Meistarakeppni KSÍ en var ekki með í dag.
„Við erum ólíkir leikmenn og ég held að það sé gott fyrir liðið að hafa ólíka framherja. Ég og Niko erum góðir félagar, það er gaman að keppa við hann um sætið og við styðjum líka við bakið á hvor öðrum. Það er bara skemmtilegt."
Hvernig metur hann undirbúningstímabilið hjá sér persónulega?
„Þetta er þokkalega góð byrjun fyrir mig persónulega. Ég er að koma mér í almennilegt stand, maður kemst í besta standið með því að spila leiki. Maður er að komast betur inn í þetta og kynnast leikstílnum hjá hverjum og einum. Það getur allt tekið tíma, mér finnst ég vera að skilja hvern og einn betur."
Víkingur hefur leik í Bestu deildinni á föstudaginn, gegn Breiðabliki á heimavelli.
„Það eru tvö sterk lið að spila fyrsta leikinn og það er mikilvægt að byrja vel," segir Elías en viðtalið má sjá í heild í sjónvarpinu hér að ofan.
