Gylfi Þór Sigurðsson.
Víkingar eru komnir áfram í 16-liða úrslit Mjólkurbikarsins eftir 4-2 útisigur gegn Fram í skemmtilegum leik sem fram fór í Úlfarsárdalnum. Aron Baldvin Þórðarson, aðstoðarþjálfari Víkings, ræddi við Fótbolta.net eftir leikinn.
Lestu um leikinn: Fram 2 - 4 Víkingur R.
„Fram er mjög trikkí andstæðingur að mæta, eru þéttir fyrir og stórhættulegir í skyndisóknum. Mér finnst þeir vera með mjög vanmetið lið, frábæra leikmenn," segir Aron.
Elías Már Ómarsson var meðal markaskorara Víkings í dag. Það var gott fyrir hann að ná inn marki.
„Niko var tæpur og Elías kom inn, átti stangarskot, skoraði og var líflegur. Það er hrikalega jákvætt."
Víkingur mætir Breiðabliki í opnunarleik Bestu deildarinnar á föstudagskvöld. Nikolaj Hansen tognaði í fyrradag og var því ekki með í dag. Er hann tæpur fyrir fyrstu umferðina?
„Nei ég geri ekki ráð fyrir því. Þetta var smá varúðarráðstöfun. Hann fékk aðeins í nárann á æfingu í fyrradag. Maður veit aldrei en þetta eru ekkert stór meiðsli."
Gylfi Þór Sigurðsson var tekinn af velli í hálfleik í dag.
„Hann fékk eitthvað högg og bólgnaði. Það þarf bara að skoða það. Ég get lítið sagt um það núna en ég á ekki von á því að það sé eitthvað vesen."
Í viðtalinu sem sjá má í sjónvarpinu hér að ofan ræðir Aron Baldvin nánar um komandi leik gegn Breiðabiki.
