Ögmundur laus allra mála og á leið í Víking

Valur hefur tilkynnt að markvörðurinn Ögmundur Kristinsson sé laus allra mála en hann og félagið hafa komist að samkomulagi um starfslok.

Ögmundur sem gekk til liðs við Val um mitt tímabil 2024 var samningsbundinn félaginu út tímabilið 2027. Hann lék alls ellefu leiki í efstu deild fyrir Val.

„Valur þakkar Ögmundi fyrir hans framlag og óskar honum alls hins besta í framtíðinni," segir í tilkynningu Vals.

Ögmundur, sem er 36 ára, er að öllum líkindum á leið til Íslandsmeistara Víkings sem sótti um undanþágu til að sækja markvörð utan glugga. Ögmundur hefur leikið nítján landsleiki fyrir Ísland og var varamarkvörður í vináttulandsleiknum gegn Japan á dögunum.